.jpg)
من يقرا العنوان يقول ان الموضوع دينى ولاكن اللى خلانى نكتب العنوان هذا هو مايجده الشاب الليبى عندما يذهب للسفارات الاوربية لاجل استخراج التاشيرة
فقد يضن البعض انى مبالغ فى وصف التاشيرة الاوربية احيانا بتاشيرة الدخول للجنة ولاكن من واقع تجربتى الشخصية على الاقل من خلال سفارتين اوربيتين اجد ان هذا التعليق مناسب جدا
فقد قدمت اوراقى لاجل استخراج التاشيرة من السفارة الايطالية قبل سنتين تقريبا ورغم انى عندى دعوة من ايطاليا لاكن لكى تصل انت للموظف داخل السفارة تبيلك ستين واسطة او .......
يصيرلك ماصارلى
طبعا مافيش اى ورقة معلقة فى السفارة تفصل الاوراق المطلوبة ولاكن تسئل الاستعلامات وكل مرة يطلعلك ورقة جديدة
ولازم طبعا تنوض الفجر وتمشى للسفارة وتلقاها زحمة وقائمة للدور وتسجل اسمك وتمشى للحوش تحساب روحك اتهنيت على الدور وتبى تولى مع العشرة وتخش انت الاول। احلم
اول ماتولى تلقا طابور مايكمل ويقولولك صح النوم هدا وين جاى وتقوللهم مسجل اسمى فى القائمة يقولولك مزقوها وداروا قائمة جديدة
وقتها انت تصيرلك الصدمة الاولى وتروح تعوض النوم اللى ناقصك من نوضانك بكرى وطبعا العمل راح عليك
وادير محاولة تانية وتالتة لين اتشد وطبعا شدت بعد ماجهدك راح يعنى مافيش سجل اسمك وروح لا اقعد جنب الباب
وتوا تحساب روحك خلاص
لالا مازالك تبهديل
توقف فى طابور طويل عريض وتوصل فى الباب يبدا الطليانى يهزب فى الليبيين على النظام وحط تحتها ستين خط طليانى وكان ماتنظموش يسكر الباب ويفوت عادى صارت قدامى ماتستغربش
وكان ربى عطاك وخشيت للسفارة ووصلت فى الموظف اللى الداخل يبدا عاد يسميلك الورق اللى ناقص وجيب هادى وغير هادى
وطبعا هدا كله وماتوصل فيه غير قريب الواحد فى الظهر ويخش الداخل قريب ساعة وبعدين يرد عليك
وتحاول مرة تانية وتالتة ورابعة ومرات اكتر
تصوروا ان فى السفارة الايطالية تريح ورقة دعوة
يعنى تمشى للاستعلامات تسئلهم على دعوة باسمك بتشوفها وصلت او لا
انا قالى وصلت وشفتها بعيونى
ويوم تقديم الاوراق الموظف اللى الداخل قالى مافيش دعوة باسمك
شنو ادير هى؟
المهم طبعا بعد قريب شهر ونص خذيت التاشيرة ومشيت والحمد لله।
فى حاجة نسيتها بعد ماتوصل لمطار روما وانت نازل فى المطار فى حجرة فى المطار خاصة باللى جايين من ليبيا وفيها زى التحقيق
يعنى علاش جاى ولمن جاى وقداش بتقعد وقداش فلوسك وووووو وتصور كان مااقتنعوش بكلامك تراجى اول طائرة جاية لليبيا يسقدوك فيها وانا مش قولت قال هدا واحد كان جنبى فى الطائرة قعد يومين فى المطار باش حصلوله طائرة مروحة لليبيا।
باهى يسى هادى التاشيرة من السفارة الايطالية وموضوع الهجرة والجو هدا ماتر فيهم
لاكن التاشيرة البريطانية علاش يصير فيها نفس البرنامج؟
يعنى تمشى بتسئل على الاوراق تاخد رقم وسكر موبايلك وتراجى فى الزحمة تقول الليبيين كلهم بيسافروا لبريطانيا
وبعدين حتى هما التقصقيص فى كل شى
ليش ماشى وشنو عندك ومنو عندك وشنو يدير ووين ساكن وعلى حساب منو وشنو يقرا والا يخدم وجيب كشف حساب ستة شهور ولازم اليوم اللى تقدم فيه يكون الكشف فى نفس اليومين هادوا ولازم اصلى وبالبريد وتعهد من اللى باعتلك الدعوة ونمودج توا تشوفه فى اسئلة اتقول امتحان فى الجامعة تصوروا 10صفحات معبية اسئلة و ووووو
باهى بعد هدا كله هل تحتاج تاشيرة لكل هذا؟
هل الاجنبى اللى بيجى ليبيا يصيرله نفس الشى؟
وبعدين علاش سفارة فى دولة عربية ماتكونش نمادج التاشيرة باللغة العربية؟
هل الليبيين اللى يسافروا لاوربا هم السبب فى هذه المعاملة من الاوربيين؟
ونصيحة فى الاخير لكل من يبى يسافر لاوربا يشوف واسطة خيرله من هالفيلم اللى حيصيرله لو فكر ان يمشى بروحه
يا اما يتوقع كل شى ويكون صبوووووووووووووووووووووووووور هلبا।
ويعبى بيانت .
نمودج تاشيرة
عبى بيانت نين تدهش
مازال نبو نعرفوا عليك اكتر
لسهزيد قول
رد بالك تنسى حاجة
هى قريب نكملوا هى
زيد عبى هدا بس
رد بالك تنسى حاجة
هى قريب نكملوا هى
زيد عبى هدا بس
ومازال هلبا ورق غير هذا اللى فى البداية بس।
شاركونا بارائكم وتجاربكم।
yasmas
المشاركات
كلامك صحيح في التاشيرة. المواطن الليبي يقود السيارة في بلاده سنين و سنين و لما يذهب لاوروبا ما يعترفوش بالرخصة الليبية و يبدي من باقي و جديد في فلوروزا و امتحان نظر و اشارات. المواطن الاوروبي غير يوري ورقة فيها كلمات بحروف لاتينية لشرطتنا يعتبروهاله رخصة درجة ثالثة و مسموح له قيادة حتى الطيارات. نحن اللي مطيحين سعدنا قدام العالم لو فيه معاملة بالمثل تو تشوف. لكن شوف لما الدولة الليبية اشترطت على الاجانب صفحة عربية في نهاية الجواز قامت الدنيا و لم تقعد حتى من الليبيين انفسهم. أماله ايمتى بيكون لينا مكان في العالم؟ اذا كنا نفسنا نحارب في ارواحنا؟ على فكرة قامت سفارة ليبيا في بريطانيا بالمعاملة بالمثل في حكاية البصمة و بصمة العين الانجليز اعتبروه جنون و الليبيين صاروا يعلقوا و اعتقد انهم الغوه. نحن للاسف ما عندناش شخصية في العالم. جميع سفراءنا اسد على و مع الغير نعامة و هكذا اجهزة الدولة الخارجية و الا المواطن الليبي المفروض يكون فوق الراس. نجوا توا لمدونتك يا حبيب انشاء الله يتم قبول الكلام اللي كتبته و تعبت فيه و ما يصيرلاش زي هلبه كلام كتبناه و منع من النشر او فشلنا في تزويد المدون بالايميل او الاسم فلا صار من النشر لا من الارسال!! على بركة الله
ردحذف